7/9/22
കോഴിക്കോട് :കാന്തപുരത്തിനും, വെള്ളാപ്പള്ളിക്കും ഡി ലിറ്റ് നൽകാൻ കാലിക്കറ്റ് സർവകലാശാലയിൽ പ്രമേയം.
ഡി ലിറ്റ് നല്‍കാന്‍ ആവശ്യപ്പെട്ടുള്ള പ്രമേയം അനുവദിക്കില്ലെന്നും പ്രമേയം പിന്‍വലിക്കണമെന്നും ഒരു വിഭാഗം സിന്‍ഡിക്കേറ്റംഗങ്ങള്‍ ആവശ്യപ്പെട്ടു. എന്നാല്‍ വിസിയുടെ അനുവാദത്തോടെ അവതരിച്ച പ്രമേയമാണെന്ന് ഇ അബ്ദുറഹിമാന്‍ വ്യക്തമാക്കി.
തര്‍ക്കം കടുത്തതോടെ ഡി ലിറ്റ് നല്‍കാന്‍ പ്രമുഖരായ വ്യക്തികളെ കണ്ടെത്തുന്നതിന് രൂപീകരിച്ച സിന്‍ഡിക്കേറ്റ് സബ് കമ്മിറ്റിയുടെ പരിഗണനയിലേക്ക് ഈ പ്രമേയം നല്‍കാന്‍ സിന്‍ഡിക്കേറ്റില്‍ തീരുമാനിക്കുകയായിരുന്നു. ഡോ. വിജയരാഘവന്‍,ഡോ.വിനോദ് കുമാര്‍,ഡോ റഷീദ് അഹമ്മദ് എന്നിവരടങ്ങുന്ന സബ് കമ്മിറ്റി വിഷയം പരിശോധിക്കും.
സമൂഹത്തിനാകെ പ്രയോജനപ്പെടുന്ന വിധത്തില്‍ വിദ്യാഭ്യാസരംഗത്ത് പ്രവര്‍ത്തനങ്ങള്‍ നടത്തുന്ന മഹദ് വ്യക്തികളാണ് കാന്തപുരം അബൂബക്കര്‍ മുസ്ലിയാരും,വെള്ളാപ്പള്ളി നടേശനുമെന്നാണ് പ്രമേയത്തില്‍ പറയുന്നത്. മറ്റ് രാജ്യങ്ങളുമായി ആശയവിനിമയം നടത്തി ന്യൂജന്‍ കോഴ്‌സുകള്‍ കേരളത്തിലെ മുഴുവന്‍ വിദ്യാര്‍ത്ഥികള്‍ക്കും ലഭ്യമാകുന്ന വിപ്ലവകരമായ പ്രവര്‍ത്തനമാണ് കാന്തപുരം ചെയ്തുകൊണ്ടിരിക്കുന്നത്. നൂറുകണക്കിന് സ്ഥാപനങ്ങള്‍ പടുത്തുയര്‍ത്തുകയും, ഇന്നും ഈ മേഖലയില്‍ സജീവമായി പ്രവര്‍ത്തിക്കുന്നയാളുമാണ് വെള്ളാപ്പള്ളി നടേശന്‍ എന്നും പ്രമേയത്തിലുണ്ട്.