കോഴിക്കോട്: ‘ അവനെ എനിക്ക് എട്ടു വര്‍ഷം കാത്തിരുന്നു കിട്ടിയ കുട്ടിയാണ്, അവനെ എനിക്ക് തിരിച്ചു വേണം.’ നിപ ബാധിതനായി കോഴിക്കോട്ടെ ആശുപത്രിയില്‍ ചികിത്സയില്‍ കഴിയുന്ന ഒന്‍പതു വയസ്സുകാരന്റെ അമ്മ മന്ത്രി വീണാ ജോര്‍ജിനോട് ഫോണില്‍ സംസാരിച്ചപ്പോള്‍ അഭ്യര്‍ഥിച്ചത് ഇതുമാത്രമാണ്.
മകനെ വളരെ ശ്രദ്ധയോടെയാണ് നോക്കുന്നതെന്നും അമ്മ വിഷമിക്കേണ്ടെന്നും മിടുക്കനായി തന്നെ തിരികെ വരുമെന്നും പറഞ്ഞാണ് മന്ത്രി അവരെ ആശ്വസിപ്പിച്ചത്.
നിപ ബാധിച്ച്‌ ചികിത്സയിലുള്ള കുട്ടിയുടെ അമ്മയുമായി ഫോണില്‍ സംസാരിച്ചെന്നും കുഞ്ഞ് പൂര്‍ണ ആരോഗ്യവാനായി തിരിച്ചു വരണമെന്ന ആ അമ്മയുടെ പ്രാര്‍ഥന സഫലമാകട്ടെയെന്നും അതിനായുള്ള എല്ലാ ശ്രമങ്ങളും നടത്തുന്നുണ്ടെന്ന് അമ്മയെ അറിയിച്ചതായും മന്ത്രി ഫേസ്ബുക്കിലും കുറിച്ചു. ആശുപത്രിയിലെ വെന്റിലേറ്ററില്‍ ചികിത്സയിലാണ് ഒന്‍പതുകാരന്‍ ഇപ്പോൾ.